నాలుగు రోజులు గడిచి
వుంటాయి....నన్ను ఈ ఆసుపత్రి లో చేర్పించి... నాలుగు రోజులేనా?...ఏమో...?
ఉచ్చ్వాస నిశ్శ్వాసాల
నిండా భరించలేని ఆసుపత్రి వాసన...శరీరం అలవాటు పడినట్టుంది....శరీరం, మనసు, మెదడు...అన్నీ...అన్నీ...ఒక
పెద్ద మత్తు జాడీలో ముంచి మూత పెట్టినట్టు...
ఒంట్లో ఏ మూలలోనో కొద్దిగా మిగిలిపోయిన శక్తిని కూడ దీసుకుని...మెల్లి
మెల్లిగా కళ్ళు తెరిచాను...
శరీరమంతా కొన్ని క్షణాలపాటు జలదరించింది....ముక్కు రంద్రాల్లోంచీ...
నోట్లోంచీ..ఒంట్లో మిగిలిన మరికొన్ని భాగాల్లోంచీ ఏవేవో సన్నని పైపులు..చూపు కొద్దిగా తిప్పి చూసాను....చుక్కలు
చుక్కలుగా రాలుతూ seline బాటిల్ .... 'బీప్'...'బీప్' మని రొద చేస్తూ మెడికల్ పరికరాలు....
నాకు, నా తల్లిఆసుపత్రిలో గడిపిన తన చివరి దినాలు జ్ఞాపకం వొచ్చాయి....
నా తల్లిని కూడా ఇలాగే
...అక్యూట్ ఇంటెన్సివ్ కేర్ లో చేర్పించాము... ఇలాగే పైపుల మధ్య బంధించబడిన నా తల్లిని
దగ్గరకువెళ్లిచూసేధైర్యంలేకబయటే వుండి పోయాను...
నా చెల్లెళ్ళు ఇద్దరూ
నా తల్లి చివరి క్షణం దాకా తన దగ్గరే వున్నారు..."అమ్మ కళ్ళు తెరిచినపుడల్లా నిన్నే
కలవరిస్తోంది అన్నయ్యా...ఒక్క సారి అమ్మకు కనిపించి వెళ్ళు....ఇక తను బతుకుతుందన్న
ఆశ లేదు... కనీసం నిన్ను కడసారి చూసుకుని వెళ్లానన్న తృప్తి నైనా మిగలనియ్యి.."...
నా చెల్లెళ్ళు ఎంతగా బతిమాలినా ... నా భార్య కోపంతో మందలించినా...చివరికి,
నా భయం ముందు,
నా తల్లి పట్ల నాకున్న
ప్రేమ వోడిపోయింది ఆ రోజు......నా తల్లి పోయిన తరువాత చాలా రోజుల పాటు నిద్ర పట్టేది కాదు...ఒక
అపరాధ భావం వెంటాడేది ఎప్పుడూ...
ఇన్నాళ్ళుగా లేని శక్తీ,
ఓపిక లాంటివి ఏవో శరీరం
లోకి ప్రవేశించినట్టున్నాయి..దేనికి సంకేతం ఇది?
చూపు మరి కాస్త పక్కకు జరిపి చూసాను...కొంచెం దూరంగా మసక మసగ్గా
ఏవో రెండు రూపాలు....ఒక రూపం తెల్లటి దుస్తుల్లో ...బహుశా డాక్టర్ అయి ఉంటాడు....ఆ
పక్కన ... ఆ పక్కన ఎవరు...?...
ఓహ్..మహీధర్...నా ఒక్కగానొక్క కొడుకు....బెంగుళూరులో ఇంజనీరింగ్
చదివే రోజుల్లో 'నిన్న ఫోన్ చేస్తానని చేయలేదేమి నాన్నా?' అని నన్ను మురిపించిన కొడుకు....ఇప్పుడు నేను ఫోన్ చేస్తే 'మీకు ఫోన్ చేయడం తప్ప
నాకు వేరే పనులేమీ వుండవనుకుంటారా?' అని నన్ను దాదాపుగా మరచిపోయిన కొడుకు....బహుశా, వాళ్ళ అమ్మ బహు జాగ్రత్తగా
కాపాడుకుంటూ వొచ్చిన మా తండ్రీ కొడుకుల సున్నిత సంబంధమేదో ఆమె పోయాక, చాలా బలహీనమై పోయింది...ఇంకా కాస్త మిగిలి వుందీ అంటే అది నా
కోడలి పుణ్యమే....
'మీరు ఒక్కరే అక్కడ వుండడం ఎందుకూ...ఇక్కడికి వొచ్చి మాతోనే ఉండరాదా!' అని ఆ పిల్ల పాపం పోరు
పెడుతూనే వుంటుంది....కానీ, ఇక్కడ హైదరాబాద్ లో ఈ లంకంత ఇంతినీ...ఈ ఆస్తుల్నీ వొదిలేసి వెళితే
ఎలా?....అందులోనూ, నాతో మనసు విప్పి నాలుగు
మాటలు మాట్లాడని నా కొడుకు ఇంట్లో ఎలా?
వీడు అమెరికా నుండి ఎప్పుడు దిగాడు?...వీడూ, డాక్టర్ గారూ అంత సీరియస్
గా ఏం మాట్లాడుకుంటూ వున్నారు?
అలా కుతూహలంతో వాళ్ళనే చూస్తున్నాను....
ఇంతలో...నాకూ...వాళ్ళకీ నడుమ, నిలువెల్లా తెల్లని దుస్తులు ధరించిన ఒక ఆకారమేదో
ప్రత్యక్షమయింది......ఆ ఆకారం చుట్టూతా భరించలేనంత తెల తెల్లని వెలుగు ...మెల్లిగా...అడుగులో అడుగేసుకుంటూ నా వైపే వస్తోంది...ఒక్క
క్షణం భయం వేసింది....గొంతు పెగిల్చి అరవడానికి ప్రయత్నించాను....లాభం లేదు...దేహపు
నూతిలో ఎక్కడో లోలోతుల్లోంచి గొంతు దాకా అరుపుని లాక్కు రావడం సాధ్యమయ్యే పని కాదని
తెలిసింది...
మెల్లిగా నా బెడ్ దాకా వొచ్చి, నా పక్కనే స్టూల్ మీద కూర్చుని చిన్నగా నవ్వింది ఆ ఆకారం..
'నీ కోసం దాచిన పాట'..... ఈ కథ 'ఇండియా టుడే' లో 1998 వ సంవత్సరంలో పబ్లిష్ అయింది...కవితాత్మకంగా ఒక ప్రేమ కథ రాయాలని ఒక తపనతో ఈ కథ రాసాను అప్పట్లో....అదొక కాలం...అదొక గాలం...సరే...విషయం ఏమిటంటే ...తదనంతర కాలంలో ఆ కథ కాపీ ని పోగొట్టుకున్నాను...ఇంకా ఆ తరువాత కాలంలో ఆ కథ రాసానన్న విషయం కూడా దాదాపు మరిచిపోయాను...
చాలా విచిత్రంగా మొన్నా మధ్య సాహితీ మిత్రుడు 'రామాచారి' గారు నా దగ్గర ఈ కథ ప్రస్తావన తెచ్చి, అప్పట్లో ఈ కథ తనకు ఎంతగానో నచ్చి, ఒక కాపీ దాచిపెట్టుకున్నానని చెప్పారు...చాలా ఆశ్చర్యం వేసింది...రామాచారి లాంటి మిత్రుల ఋణం ఏమిచ్చి , ఏం చేసి తీర్చుకోగలను..?...చాలా సుళువైన 'కృతజ్ఞతలు' తెలుపుకోవడం తప్ప....
(కథ ప్రచురించిన 'ఇండియా టుడే ' కీ, అందమైన చిత్రాలు గీసిన నర్సిం కీ మరో మారు కృతజ్ఞతలు..)
సరే...ఇక ఎటూ కాపీ దొరికింది కాబట్టి...కాసేపు అంతర్జాల మిత్రుల్ని విసిగించ వొచ్చని...ఈ కథ scanned కాపీ ని ఇక్కడ పోస్ట్ చేస్తున్నా....ఈ ప్రేమ కథ చదివేక ...మీరేమి ఫీలయ్యారో మొహమాటం లేకుండా కామెంటండి.....